ليبيافون، بالفعل عالم من المفاجآت!

انقل لكم تجربتي مع شركة LTT والتي لا تخفى على الجميع، فهي المزود المحتكر والوحيد للإنترنت في ليبيا، وتجربتي هذه المرة ليست مع خدمات الإنترنت التي تعطيها لنا، فالجبهة الألكترونية تزخر بالمقالات التي تتحدث عن سوء خدمات هذه الشركة، لكن اليوم سأخبركم عن تجربتي مع خدمة أخرى توفرها وهي شريحة (شفرة) هاتف ليبيا فون LibyaPhone SIM.

القصة تبدأ بيا أني وإثنين من صحابي بعد تحرير طرابلس وبدء الشركة في بيع الواي ماكس، مشينا لواحد من وكلاء هالشركة اللي يجي في منطقة حي الاندلس، وشدينا الطابور زينا زي الناس وكنا جايين نبو نشرو واي ماكس، وهذا كان الهدف من المشية.

فجأة تكلم واحد من الموظفين على شفرات ليبيا فون وكيف أن سعر الشفرة 120 دينار بس، والموضوع أثار فضولنا لهذا بعد ما وصل فينا الدور استفسرنا عليها والموظف بدي في تزيين هالخدمة والمزايا الموجودة فيها، والمزايا طبعا بعد التزيين و”التملعيق”..!

3

توكلنا على الله وخدينا 3 شفرات، وحدة لكل واحد فينا والجميل إن الأرقام زي ما نبوهم، يعني ممكن هذه الميزة الوحيدة اللي شدتنا فيها انك تاخد الرقم كيف ما تبيه.

خدينا الشفرات وروحنا، وكان في هاديك تلك الفترة عندي جهاز آيفون 4، فقصيت الشفرة، وملاحظة بس للعلم، راهو الشفرة مستحيل تركب على آيفون 5، لان النحاسة الداخلية كبيرة هلبا ولو قصيتها رح اضيع عليك ومش رح تشتغل، المهم، فتحت موقع الشركة www.libyaphone.ly في اللابتوب وبديت نقرا على المميزات المتوفرة، لقيت باقات وخدمات هلبا قلت خل نتوكل على الله ونشوف شن كاتبين عليها لأن اكيد في حاجة قوية هلبا..

اول شي لقيت موضوع فيه مزايا الخدمة الترحيبية (http://www.ltt.ly/libyaphone/plans/index.php?c=132)، وزي ما تشوفو كاتبين:

 

libyaphone_welcome_package

فور اشتراكك في الـخدمة ودخولك حالة الاشتراك الأساسي (أهلاً)، ستتحصل على حزمة مزايا ترحيبية تمنح لمرة واحدة كعربون ترحيب بك في ( ليبيافون )، يـمـكنك الاستفادة مـنها حصـريا للاتصـال مـع مشتـركي شـبكتي (ليبيافون) و(ليبيانا)، وهي:
الخدمة: اهلا
مكالمات صوتية: 60 دقيقة
الرسائل النصية: 30 رسالة SMS
الرسائل المتعددة الوسائط: 30 رسالة MMS
صندوق البريد الصوتي: مجاني
رصيد: 100 د.ل

طبعا هالمزايا مجانية واذا ما استعملتهاش خلال شهر رح يسحبوها منك.

بالنسبة للمكالمات تمت الاستفادة منها والرسائل النصية تمت الاستفادة منها اما البريد الصوتي فهو مش مدعوم ورسائل الوسائط مش مدعومة وايضاً المكالمات الدولية كانت مش مدعومة!

2

عطيت رقمي لشخص في الخارج ولما حاول يتصل بيا ماقدرش! ومش عارف السبب لليوم! اما خدمة الوسائط المتعددة فحاولت مرات ومرات نرسلها حتى من نفس المشغل ولكن بدون فائدة لان الخدمة مش مفعلة.

حاولت اكثر من مرة نتصل بالدعم الفني ولكن بدون فائدة. لا رد.

طبعا التغطية مربوطة بـشبكة ليبيانا يعني تهرب تغطية ليبيانا تهرب تغطية ليبيافون، ولما يصير ضغط على ليبيانا ينعكس على ليبيافون.

شئ ثاني، اذا ما عبيتش رصيد للشفرة خلال المدة المحددة فحيتم سحبها منك!! ومش حتقدر تاخذها ثاني!! يعني ضاعت عليك! بح!

المصيبة الأكبر اللي صارت لصديقي بعد فترة لما قصها للآيفون بنفسه من غير القصاصة المخصصة ليها، مشت فسدت، ولما مشى ليهم يبي يبدلها قالوله: لا يوجد استبدال!

مش عارف لليوم شن السبب ايضا علاش خدمة الوسائط المتعددة مش مدعومة وعلاش مافيش تطوير في سعر الانترنت الغالي!

وفي شي نبي إنبهكم ليه، واني نتجول في موقعهم لقيت قسم ليبيافون وبحداه تفاصيل، قلت خلي نخش ونشوف، وفتحت الصفحة (http://www.ltt.ly/libyaphone/about) وقريت وأني مش مصدق اللي نقرا فيه..

 

14l4i1
المكتوب هو:

نظرة عامة
ليبيافون هي مزود خدمة الاتصالات المحمولة الأحدث في ليبيا. أطلقت في 2011.
ليبيافون “تسهل” نقل المعلومات والاتصالات والتجارب الترفيهية للمشتركين، لتعيد تقديم المحمول بمفهوم جديد.

طبعاً من تجربتي كانت التجربة فاشلة ومافيش اي تجربة حديثة او ترفيهية اسعارهم غالية تغطية مربوطة مع ليبيانا خدمات سيئة لا شيئ جديد.

ايضا مكتوب:

نفعل ما نقول
نتعامل بثقة وتعاون وانفتاح مع بعضنا البعض، مع شركائنا، ومع مشتركينا، أفعالنا نتاج صدقنا وأخلاقنا وإدراكنا قيمنا الأساسية.

مش عارف شن المقصود بكلامهم هذا؟؟ لأني حاولت أكثر من مرة الاتصال بمركز خدمات المشتركين ومافيش رد! وبعدين وين الاحترام وهما لما تكمل المدة المحددة حيسحبو مني شفرتي ومعاش نقدر نسترجعها إلى الأبد؟

كذلك كاتبين:

نحن متفوقون
حماسنا يأتي من إحساسنا بتقديم أفضل الأداء وتحقيق الجودة العالية، فلذلك نسعى لتحسين وتطوير خدماتنا داخليا وخارجيا باستمرار. لذلك أيضا نعتقد بأننا جديرون بثقة مشتركينا.

لا حماس ولا شئ! من الأخير الخدمات زي ماهي وحتى من الموقع ماصارش عليه ولا تعديل من سنة 2011، لاتفوق ولاجديد ولا مزايا!

مكتوب ايضا:

نجعل من الأساسيات أسهل
كل ما نقوم به واضح ومباشر ومريح انطلاقا من الأساسيات، ومنتجاتنا وخدماتنا من السهل أن تفهم بسهولة. الشفافية تدعم أعمالنا والقيم التي نؤسسها.

لا اساسيات ولا كماليات!! الخدمات زي ماهي من اول ما إنعرضت، لاانترنت سريع ولاشي! نفس سرعة ليبيانا وعلى الأغلب الإنترنت ماتربطشوتقعد تحاول وتحاول مرات ومرات باش تربط النت.

ايضا كاتبين:

نحن نركز على المشتركين
نحن نكرس اهتمامنا وجهودنا من أجل إرضاء مشتركينا في كل ما نقوم به، ونسعى جاهدين لابتكار مستقبل أفضل لنا ولهم.. خدماتنا مصممة لاحتياجات المشتركين، عبر تقديم مجموعة واسعة من المنتجات.

قصدي هما المشتركين لما يتصلوا بمركز خدمات المشتركين ومافيش رد شافي كافي فكيف يقولو نركزو على المشتركين!؟ وبعدين يقولو مجموعة واسعة من المنتجات، تي على اي منتجات يتكلمو إذا كانت ابسط الخدمات زي مكالمة فيديو وانترنت سريع ورسايل وسائط مش متوفرة!؟

المهم، في قسم ثاني عندهم اسمه التقنية (http://www.ltt.ly/libyaphone/about/index.php?c=98) لما تفتحه تلقى هالكلام:

شبكة الجيل الثالث 3G
شبكة الجيل الثالث 3 G من ليبيافون تستخدم تكنولوجيا HSPA/UMTS ،التي تجعل من الممكن التمتع بمجموعة متنوعة وغنية من الخدمات اللاسلكية. كما أنها تعطينا ميزة تقديم خدمة صوت وخدمات نقل بيانات متزامنين. هذا يعني أنه يمكنك التحدث واستخدام الإنترنت في نفس الوقت.

إنترنت فائق السرعة
ليبيافون تقدم سرعة إنترنت متفوقة نظرا لتقنية الجيل الثالث 3G وحزم البيانات بسرعة عالية الوصول (HSDPA) في ليبيا مما أدى إلى ارتفاع أداء الشبكة.

واللي بنقوله كرد على هالكلام إن سرعة الانترنت في ليبيافون زي سرعتها في ليبيانا تماماً كان مش أسوأ، لأن هلبا مرات ما فيش اتصال وتقعد تراجي بالساعات!! والسرعة تكون وقت الفجر في أعلى سرعة ليها اللي هي أقل من عادية!

كذلك تغطية الجيل الثالث مش متوفرة في كل الاماكن، ومكالمات الفيديو مش مدعومة ورسائل الوسائط ايضاً مش مدعومة!

نتفكر مرة مشيت لمنطقة بعيدة عن طرابلس حوالي 160 كم، التغطية كانت تهرب وترجع ومافيش انترنت نهائياً والاتصال عاود مرة وإثنين وثلاثة لين يشد معاك الخط!

طبعاً بعد هالتجربة لوحت شفرة ليبيافون ورجعت الى ليبيانا والله غالب ما عندناش بديل.. ومن منطلق مبدأ المشاركة، قدمت لكم تجربتي ومأساتي مع هالشركة وإعتبروها نصيحة لكل شخص مقبل على شراء هذه الشفرة، ماتشريهاش وأربح راحتك ووقتك وفلوسك.

خوكم مراد أبوستة.

التصنيفات: مراجعات, من البريد, هام

تعليق 13 حتى الأن.

  1. يقول OsaMa GR:

    هيا نفسها شركة ليبيانا غير بمسمى تاني..

  2. يقول Original Dyalibya:

    معليش تصحيح , يمكن قص الشريحة العادية لتعمل على آي فون 5 , الجزء الفعال من القطعة النحاسية حجمه حوالي 15 % , وتوجد 2 من نقاط الإتصال النحاسية ليس لها وظيفة ويمكن التخلص منها بدون تأثير .

    مخطط لقص الشفرة
    http://www.airportal.de/nanosim/How_to_cut_Mini_and_Micro_SIM_to_Nano_SIM.pdf

  3. يقول Mohamed Alshebly:

    شكرا بارك الله فيك

  4. يقول Mosab Sk:

    هههههههههههههه لاحول الله
    ليبيانا للأسف

  5. يقول fath albab:

    بالفعل يا اخي شلت مكاذب لصوص ليس لديهم إلا الوهم والكذب؟
    اشتركت في الوي ماكس منذ عدة ايام وانا الان في منطقة ابوهادي بسرت فلا يوجد واي ماكس ولا غيره وايضا الهواتف الريفية معطلة
    منذ الاحداث ولم يتم تفعيلها حتي الان،
    وانا الابصدد بيع الوي ماكس الذي دفعت فيه 620 د.ل لهؤلا السراق
    انا اري انه لابد من ان نتكاثف ونضغط علي الحكومة بشأن طرد هؤﻻ البلطجية واستجلاب شركات اجنبية متخصصة في مجال الاتصالات وشبكات الانترنت؟

  6. يقول Mahmmed Mokhtar:

    والله كنت نبي نشريها بس بارك الله فيك خوي مراد

  7. يقول omar:

    شركة طوبوا وتغطية صرف صحي غير مافيش بديل تاني

  8. يقول عامر:

    بعد التحيه: شركه الاتصلات في ليبيا تتحصل على ارباح يقارب النفط بس احنا شعب يسهل الضحك عليه اولا كانت الشفره بي 400 وبعدين نزلت الى 40 بعد ماوصلت الارباح فوق التصور الى ان وصلت الشفره 5 دينار ,وللعلم انا شركه البريد تتقاسم الارباح كل سنه مما يدل ………….
    اولا لا يوجد نت كويس في ليبيا ولا اتصلات وسعر المكالمات غاليه جدا

  9. يقول Aladdin Alderbasa:

    حقاً كلامك صح مئه مئه نفس الشيء صائر معاي

اتــرك تعليقاً



2 + 8 =