خوتي في الجبهة الالكترونية الليبية، بالله أنشرو قصتي وبنحكيلكم على موقف صار معاي وأكيد يصير كل يوم لمئات غيري يبين قداش شركة ال تي تي تخنب من المواطنين..

من شهر تقريباً عبيت الوايماكس وبالزبط عبيته يوم 28 فبراير في الليل بعد ما تسكر عليا الADSL لأني مداير شهر بشهر نبدل بيناتهم.. المهم أحفظو التاريخ كويس، يوم 28 فبراير بدت الحصة الشهرية متع شهر مارس، ولظرف طاريء إضطريت نسافر أول يوم مارس وما إستعملتاش الوايماكس لين روحت يوم 14 مارس، يعني روحت والحصة الشهرية مش ممسوسة طبعاً وشفتها لقيتها ناقصة ممكن 200 ميقا بس.

مليح قلت باقي الشهر بنشدها داونلود وفيديوات، يعني قلت الحصة الشهرية متع مارس حتكمل نهاية الشهر، يعني يوم 31 مارس طبعاً.

طبعاً لا!

الشركة النصابة وقفت حسابي يوم 27 مارس في الليل، قلت شكله الوايماكس يخرط، إتصلت بالمنظومة لقيتها يقولي لاتوجد معلومات لحسابك، وهادي المسج معناها الشهر تم عليا، مش القيقات تمو!! يعني ماسد راحو عليا القيقات الفاضلين في حسابي واللي شاريهم بفلوسي، بدل مايترحلو للشهر اللي بعده، يمشو يزيدو يعطوني شهر ناقص!

المهم تو من بيعوضني في فلوسي؟؟
زقوم إن شاء الله يا شركة ال تي تي وزقوم لكل موظف قاعد يساهم في إستمرار ظلم هالشركة لليبيين.. وزقوم يا وزير الإتصالات لأنك لليوم مادرتش حل لينا.. وزقوم لكل من وعدنا بتوفير باقات ومادارهاش لين جي اليوم وإنفضحت فيها الشركة ولقيناها مدايرة باقات خاصة للوزارات وبسرية تامة بدون إعلان.

زقوم زقوم زقوم كله مال حرام اللي تاخدو فيه مننا لأنكم الوحيدين في السوق ومحتكرين للخدمة.. مطرح مايهري يهري يا نصابين.

وهادي قصتي وقصة مئات من الليبيين غيري، موقعين بالإكراه مع ال تي تي على عقد إستعمال خدمة إنترنت لأن مافيش حل تاني غيرهم وياريت ينصفنا القانون على سياسة التوقيع بالإكراه اللي سبق وتكلمتو عليها في الجبهة الالكترونية من قبل.. مش عارف علاش حاس بأن الديناصورات اللي في المؤتمر الوطني مش هامتهم إنترنت ولاغيره، عندهم الإنترنت هي قوقل وجزيرة نت والعربية وبس، مش فاهمين خدماتها التانية المحرومين منها، وحتى الوزير الجديد عيينا فيه خير لكن مازال ماشفنا شي غير توقيع عقود وصفقات وماتحسن شي الخدمة قاعدة زي ماهية ومازال السوق الليبي يعاني من الإحتكار.

بالله عليكم أنشرولي رسالتي زي ماهية بالفلاقي هكي لأن في ناس ماتفهم البقري إلا بالكرشة!

مواطن ليبي
مشترك في خدمة ADSL من سنة 2006 وخدمة WiMax من سنة 2010.

التصنيفات: من البريد, هام

تعليقان 2 حتى الأن.

  1. يقول علي منصور:

    والله حصل معي تفس الشيء عبيت ب10 دينار حصة اضافية و راحت علي و اضطريت شحن مرة اخري و مالقيتش مع من نتفاهم

  2. ليبيا الاتصالات والفقر الفني للنصابه وسرقه لاتترد ابدا داعم الان بشتراكك ال تي تي جوده عاليه وسرعه في سرقه الرصيد ونت فقر وضعيف … ليبيا ال تي تي سراقه

اتــرك تعليقاً



6 − 6 =