السلام عليكم ورحمة الله وبركاته،

بالله عليكم عندي فشة غل نبي نقولها..

سبحان الله كيف ال3 قيقا مشو في غمضة عين وهما آخر ماتبقى في الحصة الشهرية!! يوم 26 شفت الحصة لقيتها مازال 3 قيقا وشوية، نضت سكرت كل حاجة في الجهاز إتدير في أبديت والتلفون صكرت الواي فاي فيه وخليته لما نبي نت في التلفون قلت نفتحه.

جي يوم 27 في الليل النت فصلت.. قلت شكلها الشركة كالعادة.

اليوم الصبح كله مافيش نت، بعتت رسالة لكم صديق نسأل فيهم عندهم نت ولا لا، طلعت أني الوحيد ماعنديش.. خشيت عن طريق ليبيانا 3G وشفت الرصيد لقيتهم ال3 قيقا بححححح.

تو كان نقولو مانفهمش في الكمبيوتر ممكن نقولو ناسي حاجة.. لكن ياناس هادي خدمتي وهوايتي من أكثر من 15 سنة!!؟

أني متأكد أن منظومة الشركة فيها حاجة غلط، لأن الشكاوي من النوع هذا تكررت هلبا من عدة أشخاص، لما رصيدك يقرب يتم، فجأة تلقاه تصفر.. يا غما المنظومة ماتحسبش صح، يا إما في خطأ معين المهندسين يديرو فيه ومش زابطينه.

نشهد بالله إن الشركة هادي خنابة، مش من اللقطة هادي بس، هادي الله غالب ماعنديش عليها دليل، لكن اللي عندي عليها دليل وواضح جداً ومثبت من قبل مئات الآلاف غيري هو لقطة كل مايفضلو قيقات نهاية الشهر ويتم الشهر وما إستخدمتهمش مايرحلوهمش للشهر اللي بعده، بل يلهطوهم على بارد مبرّد وكأن شيئاً لم يكن.. يعني لو الخدمة ممتازة وأني نتدلع ما إستخدمتهمش ممكن نلقالهم عذر، لكن الخدمة جودتها زي ال(#$%^&$*$#$%!^%@$#) يعني مش قادرين نستخدمو حفنة القيقات أصلاً.. وفي الأخير ياخدوهم بكل بساطة وكأنهم جاييني بلاش مش دافع فيهم فلوس!

يعني كانا ماقدرناش نستخدموهم يتلهطو! وكانا خليناهم ودبدناهم يختفو!

مسكين المواطن الليبي، ومساكين والله لأننا متورطين مع الشركة المأفونة هادي وماعندناش بديل عليها.

معاش عرفنا نشغلو الأبديت للويندوز، ومعاش عرفنا نتفرجو على الفيديوات ومعاش عرفنا إنزلو برامج ولا أي حاجة، قاعدين بمنطق “إنجازات ثورة الفاتح” عندنا غنترنت وترحمو على ال تي تي جابتلكم إنترنت وإنتم وين كنتم من غير الشركة!؟ والحقيقة والواقع إننا عايشين في عالم الإنترنت زي ماتبينا الشركة نعيشو، ومقيدتلنا حريتنا على الإنترنت بسوء الخدمة وإنعدام الخيارات، هو برنامج واحد عجبك ماعجبكش أخبط راصك في ستين حيط ولا تقول آه الفوق!

المصيبة لما يطلع حد مسؤول عالتلفزيون ويتكلم على قطاع الإتصالات وكيف إنه مليح وكويس وأحسن من هلبا بلدان في العالم، والمصيبة الأكبر لما مايلقاش حد يرد عليه!! نتمنى بس إن الشعب الليبي يفتح عيونه ويعرف حقوقه ومايطالبش بأقل من حقه بل وفوقه منه يطالب بالأفضل، الموضوع مايوقفش عند حقك بس، الموضوع يستمر إلى الأفضل والأحسن، وبلادنا الحمدلله، عدد سكان شوية وأرض واسعة وعريضة ومركز إستراتيجي في وسط العالم وبلادنا غنية، مش ناقصنا إلا ناس همها البلاد وتطويرها، مش الخنبة والتكوليص.

 

والسلام عليكم ورحمة الله وبركاته،

(مواطن ليبي مرارته فايضة)

التصنيفات: من البريد, هام

تعليقات 6 حتى الأن.

  1. يقول AbdulaZiz Ahmed:

    السلام عليكم ورحمة الله وبركاته ..

    الله يبارك فيك .. انت هكي قلت اللى في خاطري .. بكل شركةال تي تي بجديات هرمنا منها و من نتها .. و كانك على الرصيد القيقات شىء مؤسف فعلا !! يادوب تفتح فيديو ولا ل ثنين تلقى الرصيد فيسع ما انصرف … حسبنا الله و نعم الوكيل غر امتى بيخششوا الشركات العالميه بس !!

  2. يقول Malik Dernawi:

    الشي هدا مش جديد والشركة عارفة الشي هدا لكن تدير في روحها حولة

  3. يقول بدرالدين الطروق:

    شركة خنابة و لهاطةو متتحشمش على وجهها

اتــرك تعليقاً



8 − = 7