تعقيباً على طلبنا، إستقبلنا الكثير من الرسائل، منها الطويل ويصلح لأن يكون مقالة منفردة، والكثير منها القصير مايصلح ان يوضع رفقة رسائل قصيرة أخرى.

في هذه المرة وضعنا لكم ثلاث رسائل قصيرة، كما وصلت دون تعديل، تحكي لكم عن خدمات الإنترنت في بريطانيا وكرواتيا وماليزيا، بلسان ليبيين يعرفون معاناة أخوتهم وأخواتهم هنا..

 

الرسالة الأولى:

من: زياد
العنوان: خدمات الانترنت في بريطانيا

الرسالة:
السلام عليكم ,
والله انا بصراحة نبي نتكلم في خدمات الانترنت في بريطانيا , زي ماتعرفو في بريطانيا في كذا شركة والمنافسة رهيبة بين الشركات , يعني تصور انك ممكن تحصل جهاز مودم طبعا يوصلوهولك لحوشك ويركبوه ويظبطوه حتا الظبط , وكل اللي عليك تدفعه هوا 40 باوند يعادل (80 دينار ليبي ) وهذا سعر المودم وطبعا , وبعدين توقع عقد معاهم بي 10 باوند شهري , يعطوك انترنت غير محدود يعني نزل اي شيء تبيه اي حااااااااااااااااجة ,وطبعا عندك خيارات لاكثر من شركة بس اغلى سعر تقريبا يوصل لي 17 الباوند شهريا بنفس ميزات العرض الاول بس السرعة اكثر شوية ,,,, طبعا توا نجو للب الموضوع وهوا اللي توا انا مدايره ,,,, انا مداير عقد مع شركة علي اي فون 4 واعطوني عقد فيه كل شيء غير محدود مكالمات ورسائل وانترنت ,سرعة الانترنت من 3 الى 4 ميغا تقريبا نفتح بيهم حتا في قنوات اون لاين وتنزيل وكل شيء ,وبصراحة مرتاح معاه مية في المية ,,نجو لمضوع الفلوس ,انا وقعت عقد 24 شهر ودفعت 60 باوند مقدم وتوا ندفع في 35 باوند شهريا ,,, حصلت انترنت غير محدود ومكالمات غير محدودة ورسائل غير محدودة بالاضافة لجهاز اي فون 4 جديد ,,,,,شكرا ليكم واسف عالاطالة

 

الرسالة الثانية:

من: مؤيد عثمان
العنوان: الإنترنت في كرواتيا

الرسالة:
السلام عليكم ورحمة الله وبركاته
هذه نبذة عن اسعار الإنترنت في كرواتيا عبر موفر الخدمة T-Com
حيث يتوفر الإنترنت بسرعة 4 ميقابات وبحصة غير محدودة بما يعادل 14 دولار أمريكي
اما بسرعة 10 ميقا بت فهو بما يعادل 31 دولار امريكي
ويتوفر ايضا بسرعة 20 ميقابت وبما يعادل 59 دولار شهريا
ولعل ما يميز هذه الخدمة انها مرتبطة بخط الهاتف وكذلك يمكنك ربطها بإشتراك في التلفزيون عبر الإنترنت وخدماتهم متوفرة 24 ساعة وباللغة المحلية والأنجليزية

 

الرسالة الثالثة:

من: احمد
العنوان: خدمات الانترنت في ماليزيا

الرسالة:
يوجد هنا اكثر من 5 شركات مختلفة لخدمات الاتصالات والانترنت ,, اشهرها هي شركة “TM” يوجد لديهم نوعان من الخدمات

“ADSL”

1MB = 15$
2MB = 20$
4MB = 40$

“Unifi”
خدمة عبر الالياف الضوئية وتشمل
” انترنت , تليفون ارضي ” VOIP و تلفزيون
5MB + Free Phone-Phone calls + TV chancels and Video on demand
48$

وطبعا لا يوجد شي يسمى بالحصة الشهرية او السنوية نزل لن تشبع

 


 

كانت هذه ثلاث رسائل، ومازال هناك المزيد! والدعوة لم تنتهي بعد، أرسل لنا مقالات عن سرعة الإنترنت في منطقتك أو بلدك، وذلك لزيادة وعي الناس لمستوى الخدمات في العالم، إن التغيير يبدأ منك.. فلا تتكاسل.

التصنيفات: من البريد, هام

تعليقات 10 حتى الأن.

  1. يقول Wes Sam:

    هههه وحني نطلعو في المودم من الروشن باش نحصلو تغطية .. ووزير الاتصالات قالكم احمدو ربكم اننا عاطينكم 15 جيجا المفروض 3 ولا 4 جيجا بس ساااااادكم تقول يخلص فيه من جيبه هالمتخلف هدا

  2. يقول Shehab Assed:

    هههههههههههه والله شئ يقهر الزفت !

    • يقول Abdulrhman Alayat:

      ايمات مشيت لي اوكرانيا قعدت يومين في كييف العاصمة النت واي فاي و مع ايجار الشقة ومش غالية 160 قرفن حوالي 55 دينار وقتها طبعا غير محدود و 4 ميقا ….. وبعدها استقريت باقي الشهر في اوديسا اشتركت في dsl شركة اسمها bee الشهر 24 دينار 3 ميقا و غير محدود و طبعا ايجوك لعندك ايوصلوه و يفعلوه ………. حقيقي شي يقهر الزفت

  3. يقول Ahmed Alderbaci:

    السلام عليكم
    انا مواطن من ليبيا ونعطيكم نبذه على النت الرهيب في بلادي
    بالنسبة لل ADSL
    السرعة لو يحبك ربي وفي الليل (مع االفجر يعني ) توصل لل 150 كيلو بايت في التانية
    ولو وصلت وتجيك طهقة انك تنزل حاجه تتفكر ان الشركة حاسبين عليك القيقات وتوخر وراسك لوطا
    …………
    اما الواي ماكس فاللأمانة افضل من ال ADSL بشوية
    لكن يوم الخميس مع العشية يولي زي DIAL-UP هههه
    المهم الواي ماكس على جوه ومزاجه مرات يوصل لل 300 كيلو بايت ونفرحو بيه واجد هلبا برشا بالزاف ! ( باش يفهمونا اخوتنا في المغرب العربي الكبير الحبيب الرائع ) .
    ………..
    المهم احنا خير من بريطانيا وماليزيا وحتى سنغافورة
    لو تلاحظو ان النت بالقصد مضعفين سرعته باش كل واحد يتلفت لحياته الخاصة هههههههههههه
    …………………….
    والله العين تبي تبكي الحق !

  4. يقول صلاح الدين:

    هههههههههههههههههه قالك ليبيا

  5. يقول Abdu Albari:

    كويس مافيش فرق هلبه !!!!!!!!!!!!!!؟

  6. شن درنالهم يا حبيبتي .. طلبوا 40 اعطيناهم .. طلبو 30 اعطيناهم .. اعطونا حصة شهرية (15) جيجا فقط ورضينا بيها وامرنا لله .. باه علاش ينخبوا فيها الحصة الشهرية تي هو في انسان في ليبيا يقدر ينزل 6 جيجا في يوم واحد وبسرعة النت الميتة اللي عندنا ؟؟؟

    تي غير شن درنالهم يا حبيبتي .. نعيط يا حبيبتي 🙁

    • يقول Layali Alamar:

      زعميتك اتكرموا علينا وخفضوا السعر من 40 إلى 30 واللى نقصوه ياخدوه فى الحصة الإضافية أضعاف الأضعاف…

  7. يقول خالد:

    ليا فوق السنة ابحت عن الواي ماكس ما فيش اشتراكات اجديدة و يباع الواي ماكس في السوق السوداء ب اكتر من 900دينار لصوص نصابين في السابق كنا نعلق التخلف والسرقة على الطاغية وابنائة وتخلصتا منهم ولله الحمد كيف نترك للمفسدين السفهاء ان يكونوا في مواقع قيادية.

اتــرك تعليقاً



− 3 = 2